हेटौंडा । मकवानपुर प्रहरीले लागु औषध गाँजा सहित पाँच जनालाई पक्राउ गरेको छ । प्रहरीले छुट्टा छुट्टै दुई स्थानबाट २ क्विन्टल ६५ केजी ८ सय ग्राम लागूऔषध गाँजा, योद्धा पिकअप गाडी सहित ५ जना पक्राउ गरेको हो ।

जिल्ला प्रहरी कार्यालय मकवानपुर र प्रहरी चौकी चौकीटोल मकवानपुरबाट खटिएको प्रहरी टोलीले प्रहरी चौकी चौकीटोलको कार्यालय अगाडी सवारी चेकजाँच गर्ने क्रममा भैसेबाट हेटौंडा आउदै गरेको प्र. ३–०१–०२३ च ५६४० नं.को योद्धा पिकअपमा लुकाई छिपाई ल्याएको लागूऔषध गाँजा १ सय ६५ किलो ८ सय ग्राम बरामद गरेको थियो ।

मकवानपुर हेटौंडा उप–महानगरपालिका १३ पदमपोखरी बस्ने बर्ष २८ को अरबिन्द नेपालीलाई लागुऔषध गाँजा र योद्धा पिकअप गाडी सहित नियन्त्रणमा लिई थप अनुसन्धान भईरहेको प्रहरीले जनाएको छ ।

त्यस्तै ईलाका प्रहरी कार्यालय मनहरी मकवानपुरबाट खटिएको प्रहरी टोलीले एक सय किलो गाँजा सहित चार जनालाई पक्राउ गरेको छ ।

गस्ती गर्ने क्रममा प्रहरीले मनहरी गाउँपालिका वडा नं. ६ स्थित लोथर खोला हँुदै खयरघारी तर्फ शंकास्पद रुपमा पिढ्युमा भारी बोकी आईरहेको अवस्थामा गाँजा सहित चारै जनालाई नियन्त्रणमा लिएको हो ।

प्रहरीले धादिङ रोराङ्ग गाउँपालिका वडा नं. २ बस्ने वर्ष ३० को मान बहादुर चेपाङ्ग, वर्ष ३९ को सन्त बहादुर चेपाङ्ग, मकवानपुर मनहरी गाउँपालिका वडा नं. ३ बस्ने वर्ष ५३ को बुद्धी बहादुर थिङ्ग र चितवन राप्ती नगरपालिका वडा नं. ११ बस्ने वर्ष ५५ को सञ्च बहादुर थिङ्गलाई पक्राउ गरेको हो ।

उनीहरुले बोकेको बोरा चेकजाँच गर्दा लागुऔषध गाँजा जम्मा एकसय किलो फेला परेको होे । लागुऔषध गाँजा सहित नियन्त्रणमा लिई थप अनुसन्धान भईरहेको जिल्ला प्रहरी कार्यालय मकवानपुरले जनाएको छ ।