हेटौंडा । असोज ७ गते देखि नेपाल, भारत र अन्य देशहरूमा एकैसाथ रिलिज हुन लागेको फिल्म ‘प्रेम गीत ३’ को टिम प्रचारप्रसारको क्रममा आज हेटौंडा आईपुगेको छ ।
नेपालीहरुको महान पर्व वडा दशैंको अवसरमा नेपाल र भारतमा एकसाथ प्रदर्शनको तयारीमा रहेको चलचित्रको टिमले नेपाल र नेपालीको साझा सम्पतीको रुपमा रहेको चलचित्र प्रेमगीत ३ हेर्न सबैलाई आग्रह गरेका थिए ।
हिन्दी भाषामा डबिङ भएको यो फिल्म नेपालमा पनि हिन्दी र नेपाली दुबै भाषमा एकै दिन रिलिज हुनेछ । हालसम्म भारतमा फिल्मको ट्रेलर १७ सयभन्दा धेरै हलमा बजिरहेको छ । फिल्म निर्माण टीमका अनुसार ट्रेलर बजेका सबै हलहरूमा फिल्म रिलिज हुनेछ ।
स्वर्गीय छेतेन गुरुङ र सन्तोष सेनले संयुक्त रूपमा निर्देशन गरेको फिल्ममा प्रदीप खड्का, क्रिस्टिना गुरुङ, अनुभव रेग्मी, सम्वृद्धि शाही ठकुरी, सुनिल थापा, सन्तोष सेन, माओत्से गुरुङ, पुष्कर कार्की र प्रेम पुरी लगायतका कलाकारहरूको अभिनय रहेको छ । क्रिस्टिनाले यही फिल्मबाट डेब्यू गरेकी हुन् ।
हाल फिल्म निर्माण पक्ष यो फिल्मको प्रचारका लागि भारत र नेपालका विभिन्न शहरमा दुई टोली बनाएर प्रचार–प्रसार गरिरहेको छ । भारतमा गायक पवनदीप पनि फिल्मको प्रचारमा हिँडिरहेका छन् । उनले यो फिल्मको हिन्दी भाषाको गीत गाएका छन् । उनी भारतीय गायक हुन् ।
हिन्दी भाषामा डब भएर भारतमा रिलिज हुने यो पहिलो नेपाली फिल्म हो ।
प्रतिक्रिया दिनुहोस्