हेटौँडा । गजल मञ्च मकवानपुरको २१७ औँ गजल यात्रा शनिबार हेटौँडामा भएको छ । गजल यात्रामा गजलकार दीपक गौतमको एकल वाचनका साथ नवर्सजकहरुका केही गजल वाचन गरिएको थियो ।
कार्यक्रममा गजलकार दीपक गौतमले दुई चरणमा गरि १० वटा गजल प्रस्तुत गरेका थिए । नवसर्जकको तर्फबाट ४ जनाले गजल वाचन गरेका थिए । कार्यक्रममा नवसर्जक गजलकारहरू अनसूया खनाल (कक्षा–६, तुलसीमेहर मावि) , प्राश्ना पौडेल (कक्षा–६, तासिर इङ्लिस बोर्डिङ स्कुल), रुबस पराजुली (कक्षा–६, जी. एस. निकेतन मावि) र सामना रिजाल (कक्षा–७, मकवानपुर बालविद्या सदन) ले प्रस्तुत गरेका थिए ।
गजल विधाको उन्नयन र प्रवद्र्धनमा काम गर्दै आएको गजल मञ्च मकवानपुरले हरेक महिनाको पहिलो शनिबार नियमित गजल यात्राको आयोजना गर्दै आएको छ । मञ्चले पछिल्लो समय विद्यालयहरुमा पुगी गजल प्रशिक्षणको कार्यक्रम गरी नवसर्जक केन्द्रित शृङ्खलाहरुसमेत सञ्चालन गरिरहेको छ ।
गजल मञ्च मकवानपुरका अध्यक्ष केशव समर्पणको सभाध्यक्ष तथा अग्रज साहित्यकार निमेष निखिलको प्रमुख आतिथ्यतामा कार्यक्रम भएको थियो । कार्यक्रम गजलमञ्च मकवानपुरका सचिव हरि पौड्यालले संचालन गरेका थिए ।
प्रतिक्रिया दिनुहोस्