हेटौँडा । मकवानपुरको मनहरी गाउँपालिका –५ मा बाघको आक्रमणबाट एक वृद्धाको ज्यान गएको छ । वडा नं ५ स्थित वसन्तपुरकी कान्छीमाया रुम्बाको आइतबार साँझ बाघको आक्रमणबाट मृत्युभएको घटनास्थलमा पुग्नुभएका मनहरी गाउँपालिका वडा ५ का वडाध्यक्ष दीपेन्द्र अधिकारीले जानकारी दिए ।

घर नजिकै बारीमा घाँस काट्न गएको अवस्थामा ७२ वर्षीया रुम्बालाई बाघले आक्रमण गरेपछि उनको मृत्युभएको हो । घाँस काट्न गएकी रुम्बा घर नर्फिएपछि खोजी गर्ने क्रममा बाघले वृद्धा रुम्बाको शरीर बोकेर हिडेको गाउँलेले देखेका थिए । राति १० बजे घटनास्थलमा पुगेका वडाध्यक्ष अधिकारीले भने, ‘स्थानीयले लखेटेपछि बाघ जङ्गलमा भागेको छ ।’ उनका अनुसार वृद्धाको शव क्षतविक्षत अवस्थामा घटनास्थलमा रहेको छ ।