हेटौँडा । सामुदायिक वन संरक्षण र व्यवस्थापनमा ख्याति कमाएको हेटौँडा उपमहानगरपालिका–६, चौघडास्थित रानी सामुदायिक वनको स्थलगत अवलोकन गर्न आउनेको सङ्ख्या बढ्दै गएको छ ।
पछिल्लो समय लोपोन्मुख सालक संरक्षणमा सक्रियता बढाउँदै लगेको रानी सामुदायिक वनको दोलखा र सिन्धुपाल्चोक जिल्लाबाट आएका जनप्रतिनिधि, सञ्चारकर्मी तथा वनकर्मीले स्थलगत अवलोकन गरेका छन् ।
फरेष्ट एक्सन नेपालका कर्मचारी मदन बस्यालको नेतृत्वमा आएको भ्रमण टोलीमा दोलखा र सिन्धुपाल्चोकका जनप्रतिनिधि, वनकर्मी तथा सञ्चारकर्मी सहभागी थिए ।
अवलोकनका क्रममा रानी सामुदायिक वनका अध्यक्ष केशव धितालले सामुदायिक वनको अवस्था, सालक संरक्षणका लागि समूहले सञ्चालन गरेका गतिविधि तथा वन डढेलो नियन्त्रणमा गरिएका प्रयासबारे जानकारी गराउनुभएको थियो ।
त्यसैगरी, समूहका कार्यालय सचिव भीमसेन पौडेलले वन संरक्षण, सदुपयोग, संस्थागत विकास, सामाजिक कार्य तथा पर्यापर्यटनका गतिविधिबारे जानकारी गराउनुभएको थियो ।
सर्वमान्य गणेशमान सिंह वन संरक्षण प्रथम पुरस्कारलगायत विभिन्न पुरस्कारबाट सम्मानित रानी सामुदायिक वनको हालसम्म राष्ट्रिय तथा अन्तर्राष्ट्रिय गरी ५८४ वटा भ्रमण टोलीले अवलोकन गरिसकेको कार्यालय सचिव पौडेलले बताए।
प्रतिक्रिया दिनुहोस्